سياسة الخصوصية
آخر تحديث: ٢٨ آب ٢٠٢٦
رافد٣٦٠ منصة تساعد الأنشطة التجارية ترد على زبائنها عبر واتساب وإنستغرام وماسنجر وتيليغرام وموقعها الإلكتروني. هاي الصفحة تشرح شنو نجمع، وليش، ومنو يشوفه.
منو صاحب المعلومات
كل نشاط تجاري يشترك بالمنصة هو صاحب معلومات زبائنه. إحنا نعالجها نيابة عنه فقط، وما نستعملها لأي غرض ثاني — ما نبيعها، ما نأجرها، وما نشاركها وية أنشطة ثانية.
شنو نجمع
من زبائن النشاط التجاري
- الاسم ورقم الهاتف أو معرّف الحساب على القناة اللي راسلوا منها
- نص الرسائل، والرسائل الصوتية بعد تحويلها لنص
- الصور اللي يرسلونها بالمحادثة
- تفاصيل الطلبات والحجوزات: العنوان، الوقت، المنتجات
ما نجمع أي شي غير اللي يرسله الزبون بالمحادثة نفسها. ما نتابعه على مواقع ثانية وما نربطه بحسابات ثانية.
من صاحب النشاط
- الاسم والإيميل ورقم الهاتف
- معلومات النشاط اللي يرفعها حتى يجاوب المساعد منها
- سجل الاستهلاك والفواتير
ليش نجمعها
- حتى المساعد يرد على الزبون ويعرف سياق المحادثة
- حتى صاحب النشاط يشوف محادثاته ويتدخل وقت ما يحتاج
- حتى نسجّل الطلبات والحجوزات
- حتى نحسب الاستهلاك ونصدّر الفواتير
الذكاء الاصطناعي
نص الرسائل يمر على مزوّد نماذج ذكاء اصطناعي حتى يتولّد الرد (Anthropic أو OpenAI أو Google، حسب الإعداد). الرسائل الصوتية تتحوّل لنص عبر Groq. هذولا المزوّدين ما يستعملون معلوماتك لتدريب نماذجهم حسب شروط الاستخدام التجارية المتفق عليها وياهم.
وين تنخزن
قواعد البيانات والملفات على Supabase، والتطبيق على Vercel. الاثنين يخزنون بمراكز بيانات خارج العراق. كل نشاط تجاري معزول عن غيره على مستوى قاعدة البيانات نفسها، مو بس بالبرنامج.
شكد نحتفظ بيها
- المحادثات والطلبات: ما دام حساب النشاط شغّال
- الصور: نفس المدة، وتنحذف وية المحادثة
- سجلات الاستهلاك: سنتين، لأنها سجل مالي
إذا صاحب النشاط ألغى حسابه، تنحذف معلوماته ومعلومات زبائنه خلال ٣٠ يوم.
حقوقك
إذا إنت زبون راسلت نشاط يستعمل رافد٣٦٠، وتريد تشوف معلوماتك أو تحذفها، راجع النشاط نفسه — هو صاحب المعلومات وإحنا ننفّذ طلبه. تكدر تراسلنا مباشرة وإحنا نوصّلك بيه.
إذا إنت صاحب نشاط، تكدر تصدّر أو تحذف معلوماتك من لوحة التحكم، أو تراسلنا.
الأمان
- كل الاتصالات مشفّرة (HTTPS)
- عزل على مستوى قاعدة البيانات بين الأنشطة (Row Level Security)
- الصور بمخزن خاص، والروابط مؤقتة وتنتهي
- ما نخزّن أرقام بطاقات — الدفع يمر على مزوّد الدفع
للتواصل
أي سؤال أو طلب حذف: privacy@rafid360.com